"ಸ್ಕಿಝೋಫ್ರೇನಿಯಾ" ಎಂಬ ಮಾನಸಿಕ ಕಾನ್ಸರ್

"ಸ್ಕಿಝೋಫ್ರೇನಿಯಾ" ಎಂಬ ಶಬ್ಧವೇ ಒಂಥರಾ ಇದೆ ಅಲ್ಲವೇ.ನೂರು ಜನರಲ್ಲಿ ಒಬ್ಬನಿಗೆ ಕಾಡುವ ಕಾನ್ಸರ್ ಇದು.ಮನಸ್ಸಿಗೆ ಸಂಬಂದಿಸಿದ್ದು ಅಂದರೆ ಮಾನಸಿಕ ಖಾಯಿಲೆ.ಪೇಲವ ಮುಖ ಹೊತ್ತು ತನ್ನೊಳಗೇ ಸಮಾಲೋಚನೆ ನಡೆಸುತ್ತಾ ವಿಚಿತ್ರ ಭಂಗಿಯಲ್ಲಿ ಕಾಣಲ್ಪಡುವ ಇವರನ್ನು ಸಮಾಜವು ನೋಡುವ ರೀತಿಯೇ ಬೇರೆ.ಶವ ಸಂಸ್ಕಾರದ ಸಮಯದಲ್ಲಿ ನೆರೆದವರೆಲ್ಲಾ ಗಂಭೀರವಾಗಿದ್ದರೆ ಈತ ಮಾತ್ರ ಅದು ಯಾವುದೋ ಹಾಸ್ಯ ಸನ್ನಿವೇಶದಂತೆ ನಗುತ್ತಿರುತ್ತಾನೆ.



ಸಣ್ಣ ಅಪಹಾಸ್ಯವನ್ನೂ ಸಹಿಸದೆ ಮಾನಸಿಕವಾಗಿ ಕುಗ್ಗುತ್ತಾ ಶಾರೀರಿಕ ಖಾಯಿಲೆಗಳೂ ಹಿಡಿದು ವ್ಯಕ್ತಿಯೊಬ್ಬ ಹುಚ್ಚನಾಗಿ ಬಿಡುವ ಈ ಅವಸ್ಥೆಗೆ ನಿಜವಾದ ಕಾರಣವೇ ಮೆದುಳಲ್ಲಿರುವ ನ್ಯೂರೋನುಗಳ ಶಿಥಿಲವಾಗುವಿಕೆ.ಇಲ್ಲಿ ಸಮಾಜದೊಂದಿಗೆ ಬೆರೆಯುವ ಹಾಗೂ ವಿಶ್ಲೇಷಣೆಗೆ ಸಂಬಂದಿಸಿ ಕೆಲಸ ಮಾಡುವ ಕೋಶಗಳು ಸಾಯತೊಡಗುತ್ತವೆ.

ನೋಡುಗರಿಗೆ ತೀರಾ ರೇಜಿಗೆ ಹುಟ್ಟಿಸುವ ಇಂತಹ ಮಂದಿ ಕಾಣಸಿಗುವುದು ಈಗ ಸಾಮಾನ್ಯ.ತಮ್ಮದಲ್ಲದ ತಪ್ಪಿಗೆ ವಂಶಪಾರಂಪರ್ಯವಾಗಿ (ಜೀನುಗಳ ಮೂಲಕ) ಹಿರಿಯರ ಬಳುವಳಿ ಉಡುಗೊರೆ ಇದು.ಇನ್ನು ಕೆಲವರಲ್ಲಿ ಜೀವನದಲ್ಲಿ ಎದುರಾಗುವ ಸಮಸ್ಯೆಗಳನ್ನು ಎದುರಿಸಲಾಗದೆ ಅಥವಾ ನಿರಂತರವಾಗಿ ಬಾಲ್ಯದಲ್ಲಿ ಅವಮಾನಕ್ಕೊಳಗಾದರೆ ಕಾಡುವ ಹತಾಶೆಯ ಪರಿಣಾಮ.ರೋಗವನ್ನು ಆರಂಭದ ಹಂತದಲ್ಲಿ ಯೋಗ,ದ್ಯಾನಗಳಿಂದ ತಡೆಯಬಹುದು.
ಆದರೆ ಒಂದು ಹಂತ ದಾಟಿದ್ದರೆ ನಿರಂತರ ಚಿಕಿತ್ಸೆಯ ಅಗತ್ಯವಿದೆ.

ಈ ಖಾಯಿಲೆಯ ಬಗ್ಗೆ ಸಂಶೋಧನೆಗಳು ನಿರಂತರವಾಗಿ ನಡೆಯುತ್ತಲೇ ಇವೆ."ಸ್ಕಿಝೋಫ್ರೇನಿಯಾ" ಎಂಬ ವೈಜ್ಞಾನಿಕ ಮಾಸ ಪತ್ರಿಕೆಯೇ ಮಾರುಕಟ್ಟೆಯಲ್ಲಿದೆ.
ಮಾತ್ರ ಈ ರೋಗಿಗಳ ಸಂಖ್ಯೆ ದಿನೇ ದಿನೇ ಹೆಚ್ಚಾಗುತ್ತಿದೆ.ವಿಪಯರ್ಾಸವೆಂದರೆ ರೋಗಿಯು ತನಗಿರುವ ರೋಗದ ಅರಿವೆಯಿಲ್ಲದೆ ಅಲೆದಾಡುತ್ತಿದ್ದರೆ,ಪ್ರಜ್ಞಾವಂತ ನಾಗರೀಕರ ಸಮಾಜ ಮಾತ್ರ ಇಂಥಹ ನತದೃಷ್ಟರನ್ನು ಮರುಳನೆಂದೋ ಹುಚ್ಚನೆಂದೋ ಜರೆಯುತ್ತಾ ಮುಸಿ ಮುಸಿ ನಗುತ್ತಿದೆ.

ಸಸ್ಯಗಳ ಬೆಳವಣಿಗೆಯಲ್ಲಿ ಹಾರ್ಮೋನುಗಳ ಪಾತ್ರ

ಸಸ್ಯಗಳ ಬೆಳವಣಿಗೆಯಲ್ಲಿ ಹಾರ್ಮೋನುಗಳ ಪಾತ್ರ ತುಂಬಾ ಮುಖ್ಯವಾಗಿದೆ.ಪ್ರತಿಯೊಂದು ಬಗೆಯ ಮರ,ಬಳ್ಳಿ ಗಳಲ್ಲೂ ಬಹಳ ನಿರ್ದಿಷ್ಟ ಹಾರ್ಮೋನುಗಳಿವೆ.ಸುಮಾರು ವರ್ಷಗಳ ಹಿಂದಿನಿಂದಲೇ ಇವುಗಳ ಕುರಿತು ಸಂಶೋಧನೆ ನಡೆಯುತ್ತಾ ಬಂದಿದೆ.
ಜಪಾನಿನ ಹಳ್ಳಿಯೊಂದರಲ್ಲಿ ಬೆಳೆದ ಭತ್ತದ ಗಿಡಗಳೆಲ್ಲಾ ತುಂಬಾ ಉದ್ದವಾಗಿ ಬೆಳೆದು ಬಗ್ಗಿ ಮುರಿಯುತ್ತಿದ್ದವಂತೆ.ಇದರ ಕಾರಣವನ್ನು ತಿಳಿಯಲು ನಡೆಸಿದ ಪ್ರಯತ್ನವೆಲ್ಲಾ ವಿಫಲವದಾಗ ಸಂಶೋಧಕನೊಬ್ಬ ಆ ಗಿಡಗಳ ಕಾಂಡದೊಳಗೆ ಬೆಳೆಯುವ ಶಿಲೀಂದ್ರ ವೊಂದನ್ನು ಕಂಡುಹಿಡಿದ."ಜಿಬ್ಬರೆಲ್ಲಾ ಫುಜಿಕುರೋಯಿ" ಎಂದು ಕರೆಯಲ್ಪಡುವ ಈ ಶಿಲೀಂದ್ರದ ಕಿಣ್ವಗಳೇ ಗಿಡದ ಅತಿಯಾದ ಉದ್ದವಾಗುವಿಕೆಗೆ ಕಾರಣ ಎಂದು ತಿಳಿಯಲ್ಪಟ್ಟಿತು.ಈಗ ಜಿಬ್ಬರೆಲಿನ್ ಎಂಬ ಹಾರ್ಮೋನು "ಟಿಶ್ಯು ಕಲ್ಚರ್" ನಲ್ಲಿ ಬಹಳ ಉಪಯುಕ್ತವಾದ ಘಟಕವಾಗಿದೆ.

hormones induced tissue culture 

shoot proliferation by hormone induction

ಕೃಷಿಕರು ಕೆಲವು ಸಸ್ಯಗಳ ತುದಿ ಚಿಗುರನ್ನು ತುಂಡುಮಾಡಿ ಆ ಗಿಡದಲ್ಲಿ ಕವಲು ಗೆಲ್ಲುಗಳನ್ನು ಬೆಳೆಯುವಂತೆ ಮಾಡುವುದಿಲ್ಲವೇ?..ಕಾರಣವಿಷ್ಟೇ,ಗಿಡದ ಚಿಗುರುಗಳ ತುದಿಯಲ್ಲಿ "ಓಕ್ಸಿನ್" ಎಂಬ ಹಾರ್ಮೋನು ಶೇಖರವಾಗಿರುತ್ತದೆ.ಇದರ ಕಾರ್ಯವನ್ನು ಚಿಗುರು ತುಂಡು ಮಾಡಿ ತಡೆದಾಗ ಹಾರ್ಮೋನು ಗಿಡದ ಕೆಲ ಭಾಗಗಳಿಗೆ ಪಸರಿಸಿ ಅಲ್ಲಿ ಕವಲು ಚಿಗುರುಗಳನ್ನು ಬೆಳೆಯುವಂತೆ ಮಾಡುತ್ತದೆ.ಈ ಹಾರ್ಮೋನು "ಟಿಶ್ಯು ಕಲ್ಚರ್"ನ ಲ್ಲಿ ಕೋಶ ವಿಭಜನೆಗೆ ಅತ್ಯಂತ ಉಪಯುಕ್ತವಾಗಿದೆ.

ಎಲೆಯೊಂದು ಹಣ್ಣಾದಾಗ ನೆಲಕ್ಕೆ ಬೀಳಬೇಕು ತಾನೇ?..ಇಲ್ಲಿ "ಆಬ್ಸಿಸಿಕ್ ಆಸಿಡ್" ಎಂಬ ಹಾರ್ಮೋನು ಎಲೆಯ ತೊಟ್ಟಿನ ಬುಡದಲ್ಲಿ ಶೇಖರಣೆಯಾಗಿ ಅಲ್ಲಿಯ ಕೋಶಗಳನ್ನು ಶಿಥಿಲವಾಗುವಂತೆ ಮಾಡಿದಾಗ ತನ್ನಿಂತಾನೆ ಹಣ್ಣೆಲೆಯು ಗಿಡದಿಂದ ಬೇರ್ಪಡುವುದು.

ಕಾಯಿ ಹಣ್ಣಾಗಲು ಕೂಡಾ ಬೇಕಿದೆ ಹಾರ್ಮೋನು ಸಂಘ..ಕಾಯೊಳಗೆ "ಎಥೀಲಿನ್ ಹಾರ್ಮೋನು"  ಕಾರ್ಯವೆಸಗಿದಾಗ ಹಣ್ಣಾಗುವಿಕೆ ಎಂಬುದು ಸಾಧ್ಯ.
ಹಾಗೆಯೇ ಕೆಲವೊಮ್ಮೆ ಗಿಡಗಳ ಕಾಂಡಕ್ಕೆ ಪೆಟ್ಟಾಗಿದ್ದರೆ ಸ್ವಲ್ಪ ದಿನ ಬಿಟ್ಟು ನೋಡಿ, ಅಲ್ಲಿ ಕೋಶ ವಿಭಜನೆಯಾಗಿ ಗಂಟಾದ ಪೊರೆಯೊಂದು ಇರುವುದು ಗಮನಿಸಿ.ಇದು ಗಾಯ ವಾಸಿಯಾಗಲು ಹಾಗೂ ಸಸ್ಯದ ರಸ ಸೋರಿ ಹೋಗದಂತೆ ತಡೆಯಲು  ಹಾರ್ಮೋನುಗಳೇ ಪ್ರೇರೇಪಿಸಿದ ಕೋಸ ವಿಭಜನೆಯ ಕ್ರಿಯೆಯಾಗಿರುತ್ತದೆ.
ಬೆಳಕಿನೆಡೆಗೆ ರೆಂಭೆಗಳು ವಾಲುವುದಕ್ಕೂ,ಬೇರುಗಳು ನೆಲದೊಳಗೆ ಇಳಿಯುವುದಕ್ಕೂ  ಹಾರ್ಮೋನುಗಳೇ ಕಾರಣವಾಗಿದೆ.

ಹೀಗೆ ಕೆಲವು ಹಾರ್ಮೋನುಗಳು ಸಹಜವಾಗಿಯೇ ಪ್ರಕೃತಿಯಲ್ಲಿದ್ದರೆ ಕೃತಕವಾಗಿ ರಾಸಾಯನಿಕಗಳಿಂದ ತಯಾರಿಸಿದ ಹಾರ್ಮೋನುಗಳನ್ನು ಲ್ಯಾಬುಗಳಲ್ಲಿ ಬಳಸಲಾಗುತ್ತದೆ.

ಉಪ್ಪಿನಕಾಯಿಯನ್ನು ಕಾಡುವುದೇನು ಗೊತ್ತೇ ???

citrus fruit contaminated by penicillium

ಶಿಲೀಂದ್ರಗಳ ಬಗ್ಗೆ ನಾವು ಹೆಚ್ಚಾಗಿ ತಲೆಕೆಡಿಸಿಕೊಳ್ಳುವುದಿಲ್ಲ.ಅಸಂಖ್ಯಾತ ಬಗೆಯ ಶಿಲೀಂದ್ರಗಳಲ್ಲಿ ಸೂಕ್ಷ್ಮಾಣುಗಳಿಂದ ಹಿಡಿದು ಹಲವು ಇಂಚುಗಳಷ್ಟು ಬೆಳೆಯುವ ತರದವುಗಳಿವೆ.ನಿತ್ಯ ಜೀವನದಲ್ಲಿ, ನಮ್ಮ ಮನೆಯೊಳಗೂ ಹಿತ್ತಿಲಲ್ಲೂ ಸಾಮಾನ್ಯವಾಗಿ ಕಾಣಸಿಗುವ ಕೆಲವು ಶಿಲೀಂದ್ರಗಳ ಬಗ್ಗೆ ತಿಳಿಯೋಣ.
 
ಉಪ್ಪಿನಕಾಯಿಯನ್ನು ಭದ್ರವಾಗಿ ಭರಣಿಗಳಲ್ಲಿ ವರ್ಷಾನುಗಟ್ಟಲೆ ತೆಗೆದಿರಿಸುತ್ತಾರೆ.ಎಷ್ಟು ನಾಜೂಕಾಗಿ ಕಟ್ಟಿ ಇಟ್ಟರೂ ಕಪ್ಪಾದ ಪದರವೊಂದು ದ್ರಾವಣದ ಮೇಲೆ ಆವರಿಸಿಕೊಂಡಿರುತ್ತದೆ.ಹದಿ ಕಟ್ಟುವುದು ಎಂದು ಹಿಡಿ ಉಪ್ಪು ಸುರಿದು ಬಿಡುತ್ತೇವೆ.ನಿಜವಾಗಿಯೂ ಇಲ್ಲಿ ನಮ್ಮ ಕಣ್ತಪ್ಪಿಸಿ ಭರಣಿಯೊಳಗೆ ಸೇರಿರುವುದೇ "ಪೆನಿಸೀಲಿಯಮ್" ಎಂಬ ಶಿಲೀಂದ್ರ.
ನಿಂಬೆ ಹುಳಿ ಅಥವಾ ನೆಲ್ಲಿಕಾಯಿಯನ್ನು ಕೆಲಕಾಲ ಉಪಯೋಗಿಸದೇ ಇದ್ದರೆ ಹಸುರು ಬಣ್ಣದ ಪೊರೆಯೊಂದು ಮೂಡಿರುವುದು ಕಾಣಬಹುದು ಇದುವೇ "ಆಸ್ಪರ್ಜಿಲ್ಲಸ್ ಫಂಗಸ್". ಮೆಣಸಿನಕಾಯಿ ಕೊಳೆತರೆ ಎಂಥಾ ದುರ್ವಾಸನೆ ಅಲ್ಲವೇ ?
ಇಲ್ಲಿ ಹೆಚ್ಚಾಗಿ ಇರುವುದು "ಫ್ಯುಸೇರಿಯಮ್".
ಇನ್ನು ಬ್ರೆಡ್, ಬಿಸ್ಕತ್ತುಗಳನ್ನು ದೀರ್ಘ ಕಾಲ ಇಟ್ಟರೆ "Rhizopus fungi" ಬೆಳೆಯಲಾರಂಬಿಸುತ್ತದೆ.

Aspergillus sp

ಶಿಲೀಂದ್ರದ ಒಂದು ಸ್ಪೋರ್(ಪ್ರತ್ಯುತ್ಪಾದನಾ) ಕಣ ಕೂಡ ಸಾಕು,ಅಸಂಖ್ಯಾತವಾಗಿ ಬೆಳೆಯಲು. ಮೈಸೀಲಿಯಮ್ ಬೇರುಗಳನ್ನು ಇಳಿ ಬಿಟ್ಟು ನಂತರ ಅವುಗಳು ಕವಲುಗಳಾಗಿ ಒಡೆದು ಪೋಷಕಾಂಶಗಳನ್ನು ಹೀರಿ ಹುಲುಸಾಗಿ ಬೆಳೆಯತೊಡಗುತ್ತದೆ. ಪ್ರತ್ಯುತ್ಪಾದನೆಗಾಗಿ ಮೂಡುವ ಕೋಶಚೀಲಗಳು ಅಸಂಖ್ಯಾತ ಸ್ಪೋರ್ ಕಣಗಳ ಹೊತ್ತು "ಫ್ರುಟಿಂಗ್ ಬಾಡಿ" ಎಂದು ಕರೆಯಲ್ಪಡುತ್ತವೆ. ಇವುಗಳು ಬಲಿತಾಗ ತನ್ನಷ್ಟಕ್ಕೇ ಒಡೆದು ಗಾಳಿಯಲ್ಲಿ ಸ್ಪೋರ್ ಕಣಗಳು ಸೇರಿ ವಾತಾವರಣದಲ್ಲಿ ಹಬ್ಬಿಕೊಂಡಿರುತ್ತವೆ.
ಕೈಯಲ್ಲೊಂದು ಪುಟ್ಟ ಕ್ಯಾಮರಾ ಹಿಡಿದು ತೋಟದಲ್ಲೊಮ್ಮೆ ಸುತ್ತಾಡಿ ಬರೋಣ. ಬಹಳ ಅಂದವಾದ ಅಣಬೆಗಳು, ಫಂಗೈಗಳು ಕಾಣಸಿಗುತ್ತವೆ. ಇವುಗಳ ಬಗ್ಗೆ ಸಸ್ಯಶಾಸ್ತೃದಲ್ಲಿ ಕಲಿಯಲಿಕ್ಕಿರುತ್ತದೆ. ಹಾಗೆ ಗೂಗಲ್
ನಲ್ಲಿ ಒಮ್ಮೆ ಜಾಲಾಡಿದರೆ ಚಿತ್ರ ಸಹಿತ ಬೇಕಾದಷ್ಟು ಮಾಹಿತಿ ಸಿಗುತ್ತದೆ.

Mycelium

wild mushroom sp

Dead mans finger fungus(xylaria)

Peziza cup fungi

shelf fungi

spores releasing from ascus

ಅಜ್ಜನ ಗಡ್ಡದ ರೇಶಿಮೆ ಮೀಸೆ

ತೋಟದಲ್ಲಿ ತರಗೆಲೆಗಳನ್ನು ಕೂಡಿ ಹಾಕುವಾಗ ಅಜ್ಜನ ಗಡ್ಡದ ಕೋಡುಗಳ ಗೊಂಚಲು ಸಿಕ್ಕಿತ್ತು. ಬಿಸಿಲಲ್ಲಿ ಒಣಗಲು ಹಾಕಿ ಎರಡು ದಿನಗಳು ಕಳೆದಿದ್ದವು.ಕೋಡಿನಲ್ಲಿ ಉದ್ದನೆಯ ಬಿರುಕು ಬಿಟ್ಟು ಆಗಲೇ ಬೀಜ ಪ್ರಸಾರ ಆರಂಭವಾಗಿತ್ತು.ಚಪ್ಪಟೆಯಾದ ಬೀಜಗಳನ್ನು ದೂರಕ್ಕೆ ಕೊಂಡೊಯ್ಯುವ  ತೆಳುವಾದ ಬಿಳಿ ರೇಶಿಮೆ ಕೂದಲುಗಳ ಜೋಡಣೆಯು ಬಲು ವ್ಯವಸ್ಥಿತವಾಗಿ ಅಂದವಾಗಿದೆ.ನಮ್ಮ ತೇಗದ ಮರಕ್ಕೆ ದಟ್ಟವಾಗಿ ಹಬ್ಬಿದ Wattakaka volubilis(L.f.) Stapf  ಎಂಬ ಬಳ್ಳಿಯಲ್ಲಿ ಜೋತು ಬಿದ್ದ ಕೋಡುಗಳು ಗಮನ ಸೆಳೆಯತೊಡಗಿದ್ದವು.

ವಟ್ಟಕಾಕದ ಬೀಜಗಳು ಒಣಗಿದಾಗ

ಅಜ್ಜನ ಗಡ್ಡದ ಮಾಗಿದ ಕೋಡು

ಎಕ್ಕದ ಹೂ

 ಆಸ್ಕ್ಲಿಪಿಡಿಯೇಸಿ ಕುಟುಂಬಕ್ಕೆ ಸೇರಿದ ಇಂತಹ ಸಸ್ಯಗಳಲ್ಲಿ ಕೆಲವು ವಿಶೇಷ ಗುಣಗಳಿವೆ.ಆಕರ್ಷಕವಾದ  ಹೂ ಗೊಂಚಲುಗಳಲ್ಲಿ ದಪ್ಪವಾದ ದಳಗಳೇ ಎದ್ದು ಕಾಣುವುದು.ಕೊಳವೆಯಂತಹ ಶಲಾಕೆಯ ತುದಿಯಲ್ಲಿ ಶಲಾಕಾಗ್ರಕ್ಕೆ ಒತ್ತಾಗಿ ಇರುವ ಪರಾಗರೇಣುಗಳಿಗೆ ಎರಡು ಪುಟ್ಟ ರೆಕ್ಕೆಗಳಿದ್ದು ಇವುಗಳನ್ನು ಸೂಕ್ಷ್ಮ ದರ್ಶಕದಲ್ಲಿ ವೀಕ್ಷಿಸಿದರೆ ಗುರುತಿಸಬಹುದು.ಗಿಡಕ್ಕೆ ಗಾಯವಾದಲ್ಲಿ ಲೇಟೆಕ್ಸ್ ಹಾಲು ತತ್ಕ್ಷಣ ಗಾಯವನ್ನು ಒಣಗಿಸಲು ಶುರುಮಾಡುತ್ತದೆ.ಎಕ್ಕದ ಗಿಡಕ್ಕೆ ಈ ಕಾರಣಕ್ಕೇ milk weed ಎಂದು ಹೆಸರು ಬಂತು.

ಹಾಗೆಯೇ ಜೀವಂತಿ,ಮಧುನಾಶಿನಿ ಮುಂತಾದ ಗಿಡಗಳು ಇದೇ ಕುಟುಂಬ ವರ್ಗಕ್ಕೆ ಸೇರಿವೆ.

ವಿವಿಧ ರೋಗಗಳಿಗೆ ಬಳಕೆಯಾಗುವ ಆಸ್ಕ್ಲಿಪಿಡಿಯೇಸಿ ಕುಟುಂಬದ ಸಸ್ಯ ಪ್ರಭೇದಗಳು ಅಲಂಕಾರಿಕವಾಗಿ ಉಪಯೋಗಿಸಲ್ಪಡದ ಕಾರಣ ನಮ್ಮ ಗಮನಕ್ಕೆ ಬಾರದೆ ಇದ್ದರೂ ಕಡಿಮೆ ತೇವಾಂಶ ಹಾಗೂ ಪೋಷಣೆ ಇಲ್ಲದೆ ಬೆಳೆಯುವ ಸಾಮರ್ಥ್ಯವನ್ನು ಪಡೆದಿವೆ.

ಪುಟ್ಟ ಅರಮನೆಯೊಳಗಿದೆ ದೊಡ್ಡ ಸಂಸಾರ!

                                                    

                                                

ನಾಗಬನದ ಕಾಂಕ್ರೀಟ್ ಕಟ್ಟೆಯೊಳಗೆ ತನ್ನ ಅಸ್ಥಿತ್ವವನ್ನು ಉಳಿಸಿಕೊಂಡ ಹುತ್ತಕ್ಕೆ  ನಾಗರಪಂಚಮಿಯಂದು ಹಾಲೆರೆದು ಪೂಜಿಸುವುದು ನಮ್ಮ ವಾಡಿಕೆ.ಇಲ್ಲಿ ಸರ್ಪ ದೇವರು ನೆಲೆಸಿರುವನೆಂಬ ನಂಬಿಕೆ,ಸಂಕಲ್ಪ.ಆದರೆ ಸಾಮಾನ್ಯವಾಗಿ ತಂಪಾದ ಪರಿಸರವನ್ನು ಪ್ರೀತಿಸುವ ಹಾವುಗಳು ಜನರ ಅಬ್ಬರವಿರದಿದ್ದಲ್ಲಿ ಮಾತ್ರ ಹುತ್ತದೊಳಗೆ ಆಶ್ರಯ ಪಡೆಯುತ್ತವೆ.ಇದಕ್ಕೆ ಕಾರಣ ಆ ಮಣ್ಣಿನ ಮನೆಯೊಳಗಿನ ಹವಾ ನಿಯಂತ್ರಣ ವ್ಯವಸ್ಥೆ.ಹುತ್ತದ ಮೇಲ್ಮೈ ಚೂಪಾಗಿ ಇರುವ ಕಾರಣ ಸೂರ್ಯನ ಶಾಖವನ್ನು ಹೆಚ್ಚಾಗಿ ಹೀರದು,ಹಾಗೂ ತಂಪಾದ ಹವೆಯನ್ನು ಹಿಡಿದಿಡುವ ಮಣ್ಣ ಕಣಗಳ ಜೋಡಣೆಯೂ ಬಲು ನಾಜೂಕಾದ ಕೆಲಸ.

 ಹೀಗೆ ಮಣ್ಣನ್ನು ಹದ ಮಾಡಿ ಮನೆಕಟ್ಟುವ ಕಲೆ ತಿಳಿದಿರುವ ಗೆದ್ದಲು ಹುಳುಗಳ ಜೀವನ ಚಕ್ರವೂ ಆಸಕ್ತಿಕರ. ಇಲ್ಲಿ ರಾಣಿ,ಸೇವಕರು,ಸೈನಿಕರು ಎಲ್ಲರಿಗೂ ಕೈತುಂಬ ಕೆಲಸ.ರಾಣಿ ಹುಳಕ್ಕೆ ಮೊಟ್ಟೆ ಇಡುವುದೇ ಕೆಲಸವಾದರೆ,ಇನ್ನು ಮನೆ ಕಟ್ಟುವುದು.ಆಹಾರ ಸಂಗ್ರಹಣೆ ಎಲ್ಲಾ  ಸೇವಕರ ಕೆಲಸ.ಸೈನಿಕರ ದೇಹ ರಚನೆಯೇ ವಿಭಿನ್ನ.ತಮ್ಮ ಪ್ರಮುಖ ಎದುರಾಳಿಗಳಾದ ಇರುವೆಗಳ ಸೈನ್ಯವನ್ನು ಮಟ್ಟ ಹಾಕಲು ವಿಷದ ಜೊಲ್ಲು,ಗಟ್ಟಿ ಮುಟ್ಟಾದ ಎದುರು ದವಡೆ ಇತ್ಯಾದಿ.ಹುತ್ತದ ಬಾಗಿಲಲ್ಲೇ  ಸರದಿ ಪ್ರಕಾರ ಒತ್ತೊತ್ತಾಗಿ ನಿಲ್ಲುವ ಜಾಯಮಾನ ಇವರದ್ದು.ಮೊದಲಿನ ಸೈನಿಕ ಹೋರಾಡಿ ಸತ್ತರೆ ಎರಡನೆಯದ್ದರ ಸರದಿ. ಒಂದು ಕ್ರಿಮಿ,ಕೀಟವನ್ನೂ ಒಳಗೆ ಬಿಡದೆ ಇಡೀ ಅರಮನೆಗೆ ಕಾವಲಾಗುವುದು ಈ ಪುಟ್ಟ ಸೈನ್ಯ.

ಉಷ್ಣ ವಲಯದಲ್ಲಿ ಮಳೆಗಾಲದ ಮೊದಲ ಮಳೆಗೆ ರೆಕ್ಕೆ ಮೂಡಿ ಸ್ವಲ್ಪ ಹೊತ್ತು ಹಾರಡುವ ಗೆದ್ದಲುಗಳ ಸಂತಾನೋತ್ಪತ್ತಿಗೂ ಆಗಲೇ ತಯಾರಿ ನಡೆಯುತ್ತದೆ.ಆದರೆ ಆಫ್ರಿಕಾದಂತಹ ತಂಪು ವಲಯಗಳಲ್ಲಿ ವರ್ಷದುದ್ದಕ್ಕೂ ಹಾರಾಡುವ ಸಾಮರ್ಥ್ಯವನ್ನು ಪಡೆದ ಪ್ರಭೇದಗಳಿವೆ.ಇವುಗಳ ಸಂತತಿಯೂ ಬೃಹತ್ ಆಗಿ ಬೆಳೆದು ಬಿಡುವುದಕ್ಕೆ ಕಾರಣವೆಂಬುದು ಅನ್ಯೋನ್ಯತೆ.ಯಾವಾಗಲೂ ಸೇವಕ ಹುಳುಗಳು “ಸೆಲ್ಯುಲೇಸ್” ಎಂಬ ಹಾರ್ಮೋನು(ಗ್ರಂಥಿ ರಸ) ಉಪಯೋಗಿಸಿ ಹದ ಮಾಡಿ ಕೊಳ್ಳುವ ಆಹಾರವನ್ನು ಎಲ್ಲರಿಗೂ ಸಮಾನವಾಗಿ ಹಂಚಿರುತ್ತವೆ. ಇವುಗಳ ಅನ್ನನಾಳದೊಳಗೆ ಸಿಂಬಯೋಟಿಕ್ ಶಿಲೀಂದ್ರಗಳೂ ಇವೆ.ಮಣ್ಣಿನ ವಾತಾವರಣವನ್ನು ಕಾಪಾಡುವ Termitomicoses ಶಿಲೀಂದ್ರಗಳು ಖನಿಜಗಳ ಆವೃತ್ತಿ(mineral cycling)ಯಲ್ಲಿ ಪ್ರಮುಖವಾದ ಪಾತ್ರವನ್ನು ವಹಿಸುತ್ತವೆ.  

ಇನ್ನು ಸವನ್ನ ಕಾಡುಗಳಲ್ಲಿ ೩ ಮೀಟರಿಗಿಂತಲೂ ಎತ್ತರಕ್ಕೆ ಬೆಳೆಯುವ ಹುತ್ತಗಳಿವೆ.Australia ದಲ್ಲಿ ಬಿಳಿ ಇರುವೆ (white ants) ಎಂದು ಕರೆಯಲ್ಪಡುವ ಗೆದ್ದಲುಗಳು Blattodea ಎಂಬ ವರ್ಗದ Termitoidae ಕುಟುಂಬಕ್ಕೆ ಸೇರಿದ್ದು ನಮ್ಮ ಜಿರಳೆಗೆ ಹತ್ತಿರದ ಸಂಬಂಧಿ.ಆಫ್ರಿಕಾದ ಕೆಲವು ಗೋತ್ರ ಪಂಗಡದ ಜನರು ರಾತ್ರಿ ಕಾಡೊಳಗೆ ದೀಪವನ್ನಿಟ್ಟು ಅದರ ಸುತ್ತಲೂ ಹಾರಾಡುವ ಗೆದ್ದಲುಗಳನ್ನು ಹಿಡಿದು ಫ್ರೈ ಮಾಡಿ ಸವಿಯುತ್ತಾರೆ!

  

ಒಂದು ಬರಗಾಲದ ಹಿಂದೆ

ಕೆಲವೊಮ್ಮೆ ಜನ-ಜೀವನ ಎಲ್ಲಾ ಸರಿಯಾದ ರೀತಿಯಲ್ಲಿ ಇರುವಾಗಲೇ ಹೇಳ ಹೆಸರಿಲ್ಲದ, ಇದುವರೆಗೆ ಗೊತ್ತಿಲ್ಲದ ಹೊಸ ರೋಗವೊಂದು ಹಠಾತ್ತನೆ ವಕ್ಕರಿಸಿಬಿಡುತ್ತದೆ.ಅಲ್ಲೆಲ್ಲೋ ಆಫ್ರಿಕಾದ ಚಿಂಪಾಂಜಿಯಲ್ಲಿದ್ದ ಸೂಕ್ಷ್ಮಜೀವಿ ವೈರಸ್ ‌ಈಗ ಇಡೀ ಜಗತ್ತೇ ಹೆದರುವ ಏಡ್ಸ್ ಆಗಿ ಕಾಡುತ್ತಿದೆ. ಐರಿಷ್ ಫೆಮೈನ್ ಎಂದೇ ಪ್ರಸಿದ್ಧವಾದ ಭೀಕರ ಬರಗಾಲವು Qurantine measures (ದಿಗ್ಬಂಧನ ಅಳತೆ)ಗಳು ಈಗ ಎಷ್ಟು ಅಗತ್ಯವಾಗಿದೆ ಎನ್ನುವುದಕ್ಕೆ ತಕ್ಕ ಉದಾಹರಣೆಯಾಗಿದೆ.

ಅವು ೧೮೪೪-೧೮೫೪ರವರೆಗೆ  ಐಯರ್ಲೇಂಡ್ ದೇಶವನ್ನು ಅತಿಯಾಗಿ ಪೀಡಿಸಿದ ಹಸಿವಿನ ದಿನಗಳು.ಈಗಿನ ಸೊಮಾಲಿಯಾದ ಬರಗಾಲಕ್ಕಿಂತಲೂ ಹೆಚ್ಚಾದ ಭೀಕರ ಬರಗಾಲ. ನಾವು ಇಲ್ಲಿ ಅನ್ನ,ರಾಗಿ,ಗೋಧಿಯನ್ನು ಎಷ್ಟು ಅವಲಂಬಿಸಿದ್ದೇವೆಯೋ ಹಾಗೆಯೇ ಅಲ್ಲಿಯ ಜನರ ಪ್ರಮುಖ ಆಹಾರ(staple food) ವಾಗಿದ್ದುದು ಬಟಾಟೆ(ಪೊಟಾಟೋ) ಮಾತ್ರ.ಗೋದಾಮುಗಳಲ್ಲಿ ಟನ್ನು ಗಟ್ಟಲೆ ದಾಸ್ತಾನಿರಿಸಿಧ್ಧ ಬಟಾಟೆಗಳು ತನ್ನಷ್ಟಕ್ಕೇ ಕೊಳೆಯಲಾರಂಭಿಸಿದ್ದವು.ಹೊಲದಲ್ಲಿ ನೆಟ್ಟ ಗಿಡಗಳೆಲ್ಲ ಸೊರಗಿ ಸಾಯತೊಡಗಿದ್ದವು.ಆಹಾರಕ್ಕಾಗಿ ಪರದಾಟ ಶುರುವಾಗಿತ್ತು.ರಾಜಕೀಯವಾಗಿಯೂ,ಆರ್ಥಿಕವಾಗಿಯೂ ದುರ್ಬಲವಾದ ಆ ದೇಶಕ್ಕೆ ಸಹಾಯ ಮಾಡಿದ ಶ್ರೀಮಂತ ದೇಶಗಳೂ ಕ್ರಮೇಣ ಕೈ ಚೆಲ್ಲರಾರಂಭಿಸಿದ್ದರು.

ಹೀಗೆ ಲಕ್ಷಗಟ್ಟಲೆ ಜನ ಆಹಾರವಿಲ್ಲದೆ ನರಳಿ ನರಳಿ ಸತ್ತುಹೋಗಲು ಮೂಲ ಕಾರಣ ಎಂಬುದು Phytophthora infestanse ಎಂಬ Oomycete ವರ್ಗಕ್ಕೆ ಸೇರಿದ ಒಂದು ಶಿಲೀಂದ್ರ(Fungi).ದಕ್ಷಿಣ ಅಮೇರಿಕಾ ಪ್ರಾಂತ್ಯದಿಂದ ಹಡಗುಗಳ ಮೂಲಕ ಅಯರ್ಲೇಂಡಿಗೆ ಆಮದು ಮಾಡಿಕೊಳ್ಳುತ್ತಿದ್ದ ಗೊಬ್ಬರದಲ್ಲಿ ಈ ಶಿಲೀಂದ್ರವೂ ಸೇರಿಕೊಂಡಿತ್ತು.ಐರಿಷ್ ನೆಲದ ಮಣ್ಣನ್ನು ಸೇರಿದ ಶಿಲೀಂದ್ರವು ಬಟಾಟೆಯ ಒಳಗೆ ಹುಲುಸಾಗಿ ಬೆಳೆದು “ಪೊಟಾಟೋ ಬ್ಲೈಟ್” ಎಂಬ ರೋಗ ವ್ಯಾಪಕವಾಯಿತು.ಈ ಕಾಟದಿಂದ ಪಾರಾಗಲು ಆ ಪುಟ್ಟ ದೇಶಕ್ಕೆ ಹಲವು ವರ್ಷಗಳೇ ಹಿಡಿದವು.

ಜಾಗತೀಕರಣ ಮಂತ್ರದ ಈ ಕಾಲದಲ್ಲಿ ನಾವು ಯಾವುದೇ ಹೊಸ ಸವಾಲುಗಳನ್ನು ಎದುರಿಸಲು ಸಿದ್ಧವಾಗಿರಬೇಕು.ವಿದೇಶಿ ವಿನಿಮಯ ಪದ್ಧತಿ ಸುಲಭವಾಗುತ್ತಿದ್ದಂತೆ ಬಗೆ ಬಗೆಯ ಆಹಾರಗಳು,ತಂತ್ರಜ್ಞಾನಗಳು ಎಲ್ಲದಕ್ಕಿಂತ ಮಿಗಿಲಾಗಿ ಹೊಸ ಸಂಸ್ಕ್ರುತಿಗಳು,ವಿಚಾರಗಳು ಎಲ್ಲಾ ಬಂದವು.ಆದರೆ ಎಚ್ಚರಿಕೆಯಿಂದ ಇರಬೇಕಾದದ್ದು ಬಹಳಷ್ಟಿವೆ.

ಡೋಡೋ ಈಗ ಇರಬೇಕಿತ್ತು

ಚಿತ್ರ ದಲ್ಲಿರುವ ಡೋಡೋ ಹಕ್ಕಿಯನ್ನು ನೋಡಿದವರು ಈಗ ಜೀವಿಸಿರಲಿಕ್ಕಿಲ್ಲ.ಮಾನವನ ಅಂಧ ವಿಶ್ವಾಸಕ್ಕೆ ಬಲಿಯಾದ ಒಂದು ಹಕ್ಕಿಯಿದು.೧೫೯೮ನೇ ಇಸವಿ ಕಾಲದವರೆಗೆ ಮೋರಿಷಸ್ ದ್ವೀಪದಲ್ಲಿ ಜನ ವಾಸವಿರಲಿಲ್ಲ.ಆದರೆ ಅಲ್ಲಿ ಡಚ್ ವಲಸೆಗಾರರ ತಂಡವೊಂದು ಅಲ್ಲಿ ಬೀಡು ಬಿಟ್ಟು ಮರಿ ಮಕ್ಕಳು ಸಂಬಂಧಗಳು ಬೆಳೆದು ಊರು ಬೆಳೆಯತೊಡಗಿತ್ತು.ಸಂಪ್ರದಾಯ,ನಂಬಿಕೆಗಳು ಬಲವಾಗತೊಡಗಿದ್ದವು.ಈ ದ್ವೀಪದಲ್ಲಿ ಹಾಯಾಗಿದ್ದ “ಡೋಡೋ” ಗಳ ಸಂಖ್ಯೆಯು ಕೂಡಾ ದಿನೇ ದಿನೇ ಕ್ಷೀಣಿಸುತ್ತಾ ಹೋಗಿತ್ತು.  ಡೋಡೋ ಹಕ್ಕಿಯ ವಿಚಿತ್ರ ಕೂಗು ದೆವ್ವಗಳನ್ನು ಆಹ್ವಾನಿಸುತ್ತಿರುವಂತೆ ಅಲ್ಲಿಯ ಜನರಿಗೆ ಭಾಸವಾಗತೊಡಗಿತ್ತು.ಒಂದೆಡೆ ಮಾಂಸಕ್ಕಾಗಿ ಬೇಟೆ, ಅಲ್ಲದೆ ಕಂಡಲ್ಲಿ ಕೊಂದು ಹಾಕುವ ಸಂಪ್ರದಾಯವಾದಿಗಳ ಕಾಟ.ಅತ್ತ ಹಾರುವ ಸಾಮಥ್ಯ್ರವೂ ಇಲ್ಲದೆ,ದೂರ ಈಜಿ ವಲಸೆ ಹೋಗಲೂ ಆಗದೆ ಅಸಹಾಯಕವಾಗಿ ಒಂದು ಪಕ್ಷಿಯ ವಂಶವೇ ನಿರ್ನಾಮವಾಗಿ ಹೋಯಿತು.

ಇದೇ ಹಕ್ಕಿಯನ್ನು ಅವಲಂಬಿಸಿಕೊಂಡು ಒಂದು ಸಸ್ಯವೂ ಅಲ್ಲಿತ್ತು. Tambalacoque (Sideroxylon grandiflorum)   ಎಂಬ ಹೆಸರಿನ ಸಪೋಟೇಸಿ ಕುಟುಂಬದ “ ಡೋಡೋ ಮರ”.ಡೋಡೋ ತನ್ನ ಆಹಾರಕ್ಕಾಗಿ ತಿನ್ನುವ ಈ ಮರದ ಹಣ್ಣು ಜಠರ ಸೇರಿ ಅಲ್ಲಿ ಕೆಲವು ಕಿಣ್ವಗಳ ರಾಸಾಯನಿಕ ಕ್ರಿಯೆಯಿಂದ ಬೀಜಗಳು  ಹುಟ್ಟಲು ಅನುಸಾರವಾಗಿ ಸಿಧ್ಧಗೊಂಡು ಹಿಕ್ಕೆಯಲ್ಲಿ ಸೇರಿ ಹೊರಬರುತ್ತಿದ್ದವು.ಈಗ ಮರ ಉಳಿದಿದೆ.ಮತ್ತೆ ಹಣ್ಣು ತಿಂದು ಬೀಜ ಬಿತ್ತಿ ಹೊಸ ಗಿಡ ಬೆಳೆಸಲು ಅದರ ಗೆಳೆಯರಿಲ್ಲ.

ಡೋಡೋವಿನ ಕಥೆ ಹಲವರಿಗೆ ಪಾಠಕ್ಕಿದೆ.ಕಂಠಪಾಠ ಮಾಡಿ ಪರೀಕ್ಷೆಯಲ್ಲಿ ಭಟ್ಟಿ ಇಳಿಸಿದ್ದಿದೆ.ಆದರೂ ಕೆಲವೊಮ್ಮೆ  ಪಠಣ ಮಾಡಿದ್ದು ಬರೀ ಅಂಕಗಳಿಗೋಸ್ಕರ ಎಂದು ಒಪ್ಪಿಕೊಳ್ಳಬೇಕಾಗುತ್ತದೆ.ಯಾಕೆಂದರೆ ನಮ್ಮೂರಲ್ಲೇ ಕಾಣ ಸಿಗುವ ಕಾಡು ಕೋಳಿ,ಉಡ ಮುಂತಾದ ಜೀವಿಗಳಿಗೆ ಈಗ ಮಾಂಸಕ್ಕಾಗಿ ಒಳ್ಳೆ ಬೇಡಿಕೆಯಿದೆ.ಇದರಿಂದ ಸುಲಭವಾಗಿ ಹಣ ಮಾಡುವ ಯೋಚನೆ ಇರುವ ಕೆಲವು ಮಂದಿ ಈ ಮೂಕಪ್ರಾಣಿಗಳ ಬೇಟೆಯಲ್ಲಿ ಸಕ್ರಿಯವಾಗಿ ತಮ್ಮನ್ನು ತೊಡಗಿಸಿ ಕೊಂಡಿದ್ದಾರೆ.ಇಂತವರ ಮುಂದೆ conservation,food chain ಮುಂತಾದವುಗಳ ಬಗ್ಗೆ ಹೇಳಲು ಸಾಧ್ಯವಿದೆಯೇ?